មន្ត្រីបរិស្ថានខេត្តមណ្ឌលគិរីបង្ក្រាបក្រុមអ្នកលួចចូល អារឈើត្រូវបានដោះលែងវិញក្រោយទូទាត់លុយ
24-May-2016 | ដោយ មែន កំសត់
ខេត្តមណ្ឌលគិរី ៖ ប្រភពព័ត៌មានបានឲ្យដឹងថា មនុស្សចំនួន៨នាក់ គោយន្តកន្រៃ្ត៧គ្រឿង និងសម្ភារៈសម្រាប់អារឈើមួយចំនួន ដែលមន្ត្រីបរិស្ថានខេត្តបើកប្រតិបត្តិការបង្ក្រាបក្រុមអ្នកលួចចូល អារឈើនៅក្នុងព្រៃការពារមណ្ឌលគិរីកាលពីរសៀលថ្ងៃទី២១ ឧសភា ២០១៦ ក្នុងស្រុកកោះញែក ត្រូវបានដោះលែងវិញហើយកាលពីវេលាម៉ោង១១ព្រឹក ថ្ងៃទី២៣ ឧសភា ២០១៦ ។
សេចក្តីរាយការណ៍ពីស្រុកកោះញែកបានឲ្យដឹងថា ការឃាត់ខ្លួនមនុស្ស៨នាក់ខាងលើ និងបញ្ជូនមកកាន់មន្ទីរបរិស្ថានខេត្តមណ្ឌលគិរីកាលពីថ្ងៃទី២១ឧសភា ដើម្បីកសាងសំណុំរឿង ចំណែកវត្ថុតាងត្រូវបានមន្ត្រីបរិស្ថានផ្ញើទុកនៅស្នាក់ការព្រៃ ការពារមណ្ឌលគិរី ស្រុកកោះញែក បណ្តោះអាសន្ន រង់ចាំដោះស្រាយបន្ត ។
ទោះជាយ៉ាងណា ប្រធានមន្ទីរបរិស្ថានខេត្តមណ្ឌលគិរី លោក ឈិត សុផល អ្នកយកព័ត៌មានមិនអាចសុំការបំភ្លឺបានទេនៅព្រឹកថ្ងៃទី២៤ឧសភា នេះ ហើយជាមួយគ្នានេះដែរ អនុប្រធានមន្ទីរបរិស្ថានខេត្តមណ្ឌលគិរី លោក ហាន សាខន នៅពេលអ្នកកាសែតសុំការបំភ្លឺតាមទូរស័ព្ទ មានអ្នកឆ្លើយថា មិនមែនជាលេខរបស់លោក ហាន សុខន នោះទេ ។ ជាមួយគ្នានេះដែរ វត្ថុតាងដែលមន្ត្រីបរិស្ថានផ្ញើរនៅស្នាក់ការផ្នែករដ្ឋបាលព្រៃឈើ កោះញ៉ែកនោះ លោក ឈួន សេរីវឌ្ឍន៍ ក៏មិនអាចសុំការបកស្រាយបានដែរ ដោយទូរស័ព្ទរបស់លោកមិនមានអ្នកឆ្លើយតប។
អភិបាលស្រុកកោះញ៉ែក លោក ម៉ើល សឿន បានឲ្យដឹងតាមរយៈទូរស័ព្ទនៅព្រឹកថ្ងៃទី២៤ឧសភានេះថា មន្ត្រីបរិស្ថានខេត្តមណ្ឌលគិរីពិតជាបានឃាត់ខ្លួនមនុស្សប្រុសស្រី ចំនួន៨នាក់រួមនិងគោយន្តកន្ត្រៃ៧គ្រឿងពិតមែន តែករណីនេះលោកបានទទួលព័ត៌មានថា មន្ត្រីជំនាញរួមនិងភាគីពាក់ព័ន្ធបានជូបដោះស្រាយគ្នារួចរាល់ហើយ ដោយខាងមន្ត្រីជំនាញបានអនុញ្ញាតអោយពលរដ្ឋទាំងនោះយកគោយន្តត្រឡប់ ទៅផ្ទះវិញ និងបានធ្វើកិច្ចសន្យាបញ្ឈប់ការកាប់ដើមឈើនៅក្នុងព្រៃកាពារបន្ត ទៀត។
ប្រភពព័ត៌មានដាច់ដោយឡែកបានលើកឡើងថា ក្នុងការដោះលែងពលរដ្ឋរួមនិងវត្ថុតាងជាក់ស្តែងទាំងនោះ មន្ទីរបរិស្ថានបានឲ្យធ្វើកិច្ចសន្យាឲ្យប្រជាពលរដ្ឋបញ្ឈប់រាល់ សកម្មភាពកាប់រុករាន្តព្រៃឈើក្នុងតំបន់ការពារ ហើយលើសពីនេះមន្ត្រីជំនាញបានទាមទារប្រាក់ក្នុងម្នាក់១លានរៀលជា ថ្នូរនិងការដោះលែងមិនបញ្ជួនទៅកាន់ស្ថាប័នតុលាការផងដែរ ។ជុំវិញព័ត៌មានដែលមានការលើកឡើងថា មន្ទីរបរិស្ថានខេត្តមណ្ឌលគិរីទារប្រាក់ពីពលរដ្ឋ១លានរៀលក្នុង ម្នាក់ជាថ្នូរក្នុងការដោះលែងពួកគេនោះ អ្នកសារព័ត៌មានមិនអាចស្វែងរកការបកស្រាយណាមួយពីមន្ត្រីជំនាញបាន ទេ នៅថ្ងៃទី២៤ឧសភានេះ ។
ចំនួនអ្នកទស្សនា
- ថ្ងៃនេះ3141
- ម្សិលមិញ4471
- សប្តាហ៍នេះ3141
- ខែនេះ228811
- ឆ្នាំនេះ228811
- សរុប20671267